Mat 3:1-12 | YomNWM | STEP | Mu bilumbu bina, Yowani Mbotiki wuyiza ayi wutona longa mu dikanga didi mu tsi Yuda.

Matthew 3:1-12

Yowani Mbotiki mvuala Nzambi

(Malako 1.2-6 ; Luka 3.1-6 ; Yowani 1.19-23)

1 Mu bilumbu bina, Yowani Mbotiki wuyiza ayi wutona longa mu dikanga didi mu tsi Yuda. 2 Wuba longanga :

—Lubalula mavanga ! Bila kipfumu ki Diyilu kinefikimini.

3 Yowani, niandi bayolukila kuidi mbikudi Ezayi :

Mbembo yi mutu wulembo yamikina mu dikanga :
Lukubika nzila mu diambu di Pfumu !
Luludika minsolo miandi !
4 Yowani wuba vuatanga minledi mivangulu mu mika mi kamela ^{▼▼Kamela : phila bulu kidi banga phunda, kidi ayi khuki vayi kikubuku mu natanga bizitu mu dikanga. Kizebi nua nlangu wuwombo-wombo.}, bosi nsinga kaba kanganga mu luketo wuvangulu mu nkanda wu bulu ; bidia kaba ndianga makhoko ayi niosi. 5 Batu batotukila ku Yelusalemi, mu Yuda dioso ayi mu yenda nlangu Yolidani baba nkuizanga kuidi Yowani. 6 Atu beni bu baba tambudilanga masumu mawu, Yowani wuba kuba botikanga mu nlangu Yolidani.

(Luka 3.7-9)

7 Vayi bu kamona Bafalisi ayi Basaduki bawombo baba nkuizanga ku botama, buna wuba kamba :

—A bana ba bikusa ; a nani wululubudi mu tina nganzi yoyi yeka kuiza ? 8 Monisanu mavanga mamboti mammonisa ti bukiedika lubaludi mavanga. 9 Lubika banza bu lulembo yindula mu mintima mieno : “Beto tuidi mu nkuna wu Abalahami !” Bila bukiedika ndikulukamba ti Nzambi lenda totula bana ba Abalahami mu matadi mama ^{▼▼Mu minkanda minkaka musonama : Nzambi lenda kitula matadi mama bana ba Abalahami.}.

10 Lukeba : soka kikubimini mu kuanga mianzi mi minti. Woso nti wunkambu buta mimbutu mamboti, wela kuangu ayi wela viku ku mbazu.

(Malako 1.7-8 ; Luka 3.15-18 ; Yowani 1.24-28)

11 —Minu mu nlangu ndilembo lubotikila mu diambu di monisa ti lulembo balula mavanga ; vayi mutu wowo wulembo yizi wundutidi mu lulendo ; ndisi fuana ko mu nata zisapatu ziandi. Niandi wela lubotikila mu Pheve Yinlongo ayi mu mbazu. 12 Ayi simbidi vevolo mu mioko miandi, niandi wela kombula buangu kioki kela vevila ; wela lunda ble ^{▼▼ble : phila kunusu kinsadulungu falina ; kidi banga loso.} ku yilu banga vayi wela yoka biti ku mbazu yi kayilendi zima ko.